张爱玲提示您：看后求收藏（指间小说网www.zhijianbook.net），接着再看更方便。
朴斋听说，方解其意，笑道：“耐叹说陆秀宝，我只道仔耐哚说我有仔啥生意了恭喜我。”王阿二道：“耐有生意无生意，倪陆里晓得嗄。”朴斋道：“价末陆秀宝搭开宝，耐倒晓得哉。故是张先生来搭耐叹说个（口宛）。”老娘姨道：“张先生就搭耐来仔一埭，以后匆曾来歇。”王阿二道：“张先生是勿来哉。我搭耐说仔罢，倪搭用好包打听来里，阿有啥勿晓得？”朴斋道：“价末昨日夜头是啥人住来哚陆秀宝搭，耐阿晓得？”王阿二努起嘴来道：“哪！是只狗哉囗。”被朴斋一口啐道：“我要是住来哚末，也勿来问耐哉（口宛）！”王阿二冷笑道：“（要勿）塔我瞎说哉！开宝客人住仔一夜天，就匆去哉，耐骗啥人嗄！”朴斋叹口气，也冷笑道：“耐哚包打听阿是个聋甏？教俚去喊个剃头司务拿耳朵来作作清爽，再去做包打听末哉。”王阿二听说，知道是真情了，忙即问道：“阿是耐昨日夜头匆来哚陆秀宝搭？”朴斋遂将陆秀宝如何倡议，如何受欺，如何变卦，如何绝交，前后大概略述一遍。
那老娘姨插口说道：“赵先生，也要算耐有主意哚，倒拨来耐看穿哉。耐阿晓得，倌人开宝是俚哚堂子里口谈（口宛），陆里有真个嗄，差勿多要三四转五六转哚。耐末豁脱仔洋钱，再去上俚哚当水，啥犯着嗄？”王阿二道：“早晓得耐要去上俚哚当水末，倪倒勿如也说是清倌人，只怕比仔陆秀宝要像点哚。”朴斋嘻嘻的笑道：“耐前门是匆像哉，我来搭耐开肉后门走走，便当点阿好？”王阿二也不禁笑道：“耐个人啊，拨两记耳光耐吃吃末好！”老娘姨随后说道：“赵先生，耐也自家勿好。耐要听仔张先生闲话，就来里倪搭走走，勿到别场花去末，倒也匆去上俚哚当水哉。像倪搭阿有啥当水来拨耐上嗄？”朴斋道：“别场花是我也无拨，陆秀宝搭勿去仔，就不过该搭来走走。前几日我心里要想来，为仔张先生，倘忙碰着仔，好像有点难为情。难是张先生搬得去哉，也勿要紧哉。”
王阿二忙即问道：“阿是张先生寻着仔生意哉？”朴斋遂又将张小村现住十六铺朝南大生米行里的话，备达一遍。那老娘姨又插口说道：“赵先生，耐忒啥胆小哉。（要勿）说啥张先生倪搭匆来，就算俚来仔碰着耐来里，也无啥要紧（口宛）。
有辰光倪搭客人合好仔三四个朋友一淘来，才是朋友，才是客人，俚哚也算闹热点好白相；耐看见仔要难为情杀哉！”王阿二道：“耐末真真是个铲头！张先生就是要打耐末，耐也打得过俚（口宛），怕俚啥嗄？要说是难为情，倪生意只好（要勿）做哉。”
![星际供应商[种田]](https://www.zhijianbook.net/images/dWpzNDU5OHNkZmQyNWVkZiKFo4wPb0PbcjT68KrHyeIHAfQYNuV0ZQ6QcOYxHDZq)
