张爱玲提示您：看后求收藏（指间小说网www.zhijianbook.net），接着再看更方便。
道：“我要问耐句闲话，耐阿是搭松桥一淘米浪白相？”朴斋被他突然一问，不知为着何事，心中“突突”乱跳。吴小大拍案攒眉道：“勿呀！我看耐年纪轻，来里上海，常恐去上俚当水！就像松桥个杀坯末，耐终（要勿）去认得俚个好。”朴斋依然目瞪口呆，没得回答。吴小大复鼻子里哼了一声，道：“我搭耐说仔罢，我个亲生爷俚还勿认得囗，再要来认得耐个朋友？”
朴斋细味这话稍有头路，笑问究竟缘何。吴小大从容诉道：“我做个爷，穷末穷，还有碗把苦饭吃吃个囗。故歇到上海来，勿是要想啥倪子个好处；为是我倪子发仔财末，我来张张俚，也算体面体面。陆里晓得个杀坯实概样式！我连浪去三埭，帐房里说勿来浪，倒也罢哉；第四埭我去，来浪里向勿出来，就帐房里拿四百个铜钱拨我，说教我趁仔航船转去罢。我阿是等耐四百个铜钱用！我要转去，做叫化子讨饭末也转去仔，我要用耐四百个铜钱！”一面诉说，一面竟号啕痛哭起来。
朴斋极力劝慰宽譬，且为吴松桥委曲解释。良久，吴小大收泪道：“我也自家勿好，教俚上海做生意。上海夷场浪勿是个好场花。”朴斋假意叹服。吃过五六开茶，朴斋将一角小洋钱会了茶钱。吴小大顺口鸣谢，背上包裹同下茶楼，出门分路。
吴小大自去日辉港觅得里河航船回乡。赵朴斋彳亍宝善街中，心想这顿夜饭如何吃法。
第三十回终。
第三十一回 长辈埋冤亲情断绝 方家贻笑臭味差池
按：赵朴斋自揣身边仅有两角小详钱，数十铜钱，只好往石路小饭店内吃了一段黄鱼及一汤一饭；再往宝善街大观园正桌后面看了一本戏，然后散场回家。那时敲过十二点钟，清和坊各家门首皆点着玻璃灯，惟自己门前漆黑，两扇大门也自紧闭。朴斋略敲两下，那相帮开进。朴斋便问：“台面阿曾散？”相帮道：“散仔歇哉，就剩大少爷一干仔来浪。”
朴斋见楼梯边添挂一盏马口铁壁灯，倒觉甚亮，于是款步登楼，听得亭子间有说话声音，因即掀帘进去。只见母亲赵洪氏坐在床中，尚未睡下，张秀英、赵二宝并坐在床沿，正讲得热闹。见了朴斋，供氏先问：“阿曾吃夜饭？”朴斋说：“吃过哉。”朴斋问：“瑞生阿哥阿是去哉？”秀英道：“勿曾去，困着来浪。”二宝抢说道：“倪新用一个小大姐来浪，耐看阿好？”说着，高声叫：“阿巧。”
